توت آغاجی

سینم داغلاندی- داغلاندی

یوردومون باغری یاریلدی

قاراداغا اولان اولدو

سینم  داغلاندی- داغلاندی

گئجه‌یه دؤندو گوندوزلر

قان آغلادی داغلار – دوزلر

آلوولاندی ، یاندی سئوزلر 

سینم داغلاندی – داغلاندی

ائل‌لر منه درمان وئرین

اومید یوخسا گومان وئرین

کؤنلوم سسلی کمان وئرین

سینم داغلاندی – داغلاندی

کؤنول قوشوم

گؤی اوزونده سئیره ک اولدوز، واخت گئجیشیب، قاش قارالیب

کؤنول قوشوم مزارلاین باش داشینا، قونوب قالیب

آغ بیرچکلی آنام کیمی ظولوم- ظولوم آغلار، او دا

آنام ،ساچین یولان کیمی، سینه سینی داغلار، او دا:

یاد گلدی باخدی گئتدی

خنجرین تاخدی گئتدی

اولدوزون گؤیدن آخدی

قلبیمی یاخدی گئتدی

داغ دالیندا، گونش یاتجاق آل شفقین یاتاغیندا

سن ده یاتدین ایگید بالام قان بزه‌کلی اوتاغیندا

قارا یئل‌لر پر پر ائتدی قیزیل گولو بوداغیندا

دومانلی داغیم آغلار

بولبول سوز باغیم آغلار

گؤزومده یاش قوروسا

سینمده داغیم آغلار

گؤزونو آچ، بالام منیم ،گؤزومده قان یاشیما باخ

آغزیم دادی سنله گئتدی، زهرلنمیش آشیما باخ

درد اودوندا یانیراوره‌ک کول النمیش باشیما باخ

اوزاقلار اولماز یوووق

تورپاغین اوزو سویوق

غمیندن عزیز بالام

اوره‌ییم اویوق اویوق

گؤی اوزونده، قات قات بولوت، شر قاریشیب ،گون قارالیب

کؤنول قوشوم مین مزارین باش داشینا قونوب قالیب