ا وچوش
اوچوش
بولوتسوز ماوي گؤيه ساري
اوجالدي آغ گؤيرچين
آرخايين آرخايين
اوچدو...اوچدو... اوچدو...
بير ميرواري دنه سي کيمي گؤروندو
ماويليگين بوجاغيندا
اورهييم چيرپيندي... چيرپيندي
حسرتلري سيلکينيب
نيسگيللري سويونوب
اينجيلشيب،دينجلمک ايستهدي؛
آرزولارين قوجاغيندا
گؤيرچين اوچدو... اوچدو...
اوچوب يوخوما قوندو:
«ايکيجه خووروز ساواشدي
بيري قانا بولاشدي
قان آخدي چايا دوشدو
چايدان گؤيرچين اوچدو...»
گؤيرچين اوچدو... اوچدو...
قيزيل گوله بوکولموش يوخولاردان اويانديم:
آغزيمدا آلمالارين قيزيل دادي
اللريمده کپنکلرين توزا دؤنموش قانادي!
باشيمدا رؤيالارين هاواسي
کؤنلومده سئودالارين نيداسي
بير آياغيم گئجهده
بير ی گوندوزوده
اوچماق ايستهييرم.
شفقلي اوفولري قوجماق ايستهييرم.
سونسوز ماويليکده سوزوب،
قيزيل آلماني کهکئشان بوداغيندان اوزوب،
اينسانلارلا پايلاشماق ايسته يئرم.
آچيلمازي آچماق ايستهييرم
اوچولمازا اوچماق ايستهييرم.
1377
* استفاده از مطالب این وبلاگ با ذکر منبع بلامانع می باشد